Growing your Cosmetics business by keeping with market trends in southeast asia

ບັນດາກຸ່ມນັກທຸລະກິດເຄື່ອງສຳອາງລາວໄດ້ຈັດງານສຳມະນາສົ່ງເສີມຄວາມຮູ້ ແລະ ແນວທາງການຂະຫຍາຍການຕະຫຼາດເຄື່ອງສຳອາງຂຶ້ນ ພາຍໃຕ້ການຮ່ວມມືືກັບສະມາຄົມນັກທຸລະກິດແມ່ຍິງລາວ, ບໍລິສັດ Informa Markets ແລະ Impact Exhibition Management ພາຍໃຕ້ຊື່ງານວ່າ "ແນວໂນ້ມການຕະຫຼາດອາຊີຕາເວັນອອກສ່ຽງໃຕ້ ເພື່ອການຂະຫຍາຍທຸລະກິດເຄື່ອງສຳອາງຂອງທ່ານ" ເຊິ່ງບັນດານັກທຸລະກິດທີ່ປະກອບການທາງດ້ານເຄື່ອງສຳອາງ ແລະ ບັນດານັກທຸລະກິດຍິງກໍໄດ້ໃຫ້ຄວາມສົນໃຈເຂົ້າຮ່ວມຈຳນວນຫຼາຍ.

ເປັນກຽດກ່າວເປີດງານຄັ້ງນີ້ໂດຍ ທ່ານນາງ ສີຣິຄູນ ພູມລາວັນ ຮອງປະທານນັກທຸລະກິດແມ່ຍິງລາວ

ຈຸດປະສົງໃນການຈັດງານຄັ້ງນີ້ກໍແມ່ນເພື່ອຖອດຖອນບົດຮຽນ ແລະ ແລກ ປ່ຽນຄວາມຄິດເຫັນຂອງການເຕີບໂຕທຸລະກິດເຄື່ອງສຳອາງໃນຕະຫຼາດອາຊີຕາເວັນອອກສ່ຽງໃຕ້

ພ້ອມດຽວກັນນັ້ນ ຍັງໄດ້ຮັບກຽດຈາກທ່ານນາງ ວຽງສະໄໝ ສີລືໄຊ ຈາກກົມອາຫານ ແລະ ຢາ ແຫ່ງ ສປປ.ລາວ ໄດ້ມາເປັນວິທະຍາກອນໃຫ້ຄວາມຮູ້ທາງດ້ານນິຕິກຳ ອຢ ດ້ານເຄື່ອງສຳອາງນຳອີກ

ນອກຈາກນັ້ນແລ້ວ ທ່ານ ທິລະກອນ ອານຸວົງ ໃນນາມຜູ້ກໍ່ຕັ້ງສະມາຄົມທຸລະກິດເຄື່ອງສຳອາງລາວຍັງໄດ້ຂຶ້ນບັນຍາຍກ່ຽວກັບຂໍ້ຫ້າມ ແລະ ກົດລະບຽບຕ່າງໆ ພ້ອມທັງແນະແນວທາງການພັດທະນາຕະຫຼາດເຄື່ອງສຳອາງລາວ ແລະ ການມູນໃຊເທັກໂນໂລຢີເຂົ້າສູ່ທຸລະກິດ ໃຫ້ມີຄວາມທັນສະໄໝ ແລະ ເຂົ້າເຖິງຜູ້ບໍລິໂພກໄດ້ງ່າຍກວ່າ.

ພາຍໃນງານກຸ່ມນັກທຸລະກິດເຄື່ອງສຳອາງລາວກໍຍັງໄດ້ມີການນຳເອົາສິນຄ້າເຄື່ອງສຳອາງແບຣນລາວມາວາງສະແດງໃນງານຄັ້ງນີ້ອີກດ້ວຍ ແລະ ໜຶ່ງໃນນັ້ນແບຣນ "ດີໄລ້ ຫລວງພຣະບາງ" ໃນນາມຕົວແທນເຄື່ອງສຳອາງລາວ ກໍຍັງໄດ້ຂຶ້ນຮ່ວມແບ່ງປັນປະສົບການ ການກໍ່ຕັ້ງທຸລະກິດຕັ້ງແຕ່ອະດີດມາຈົນເຖິງປັດຈຸບັນ.

ການຈັດງານຄັ້ງນີ້ຂຶ້ນ ນັບວ່າເປັນນິມິດໝາຍທີ່ດີສຳລັບຕະຫຼາດເຄື່ອງສຳອາງລາວ ເພື່ອເປັນການຕອກຢ້ຳໃນຜະລິດຕະພັນລາວກໍດີ ຫຼື ຈະເປັນການສ້າງຄວາມໝັ້ນໃຈໃນຜະລິດຕະພັນລາວກໍດີ ຖືເປັນການເລີ່ມຕົ້ນ ແລະ ກະຕຸ້ນນັກທຸລະກິດລາວໂດຍສະເພາະເຄື່ອງສຳອາງລາວໄດ້ພັດທະນາທຸລະກິດໃຫ້ເຕີບໂຕໄປເທື່ອລະກ້າວ.

Lao Cosmetic,Informa,Impact,Lao Beauty,DeeLight,ASEAN Cosmetic,